Piştî Qersê vê carê jî li Erdexanê me. Saet derdora 12.00’an ji Qersê derdikevim û saet derdora 14.00’an digihîjim Erdexanê. Tevî ku meha gulanê ye jî di rê de berf û şilope dibare û hewa gelek sar e. Ez ê ku hînê germa Amedê bûme, vê hewaya sar a di meha gulanê de gelek zora min dibe û pozê min av dike. Avkirina pozê min karê min zehmet dike. Lê tevî vê yekê jî dibêjim; xwezî bi vê avkirina pozê min û ne bi dûmana çixarê ya li avahiyên HDP’ê yên li bajarên Serhedê.
Mîna dosyayên xwe yên beriya niha dîsa berî ku derbasî atmosfera hilbijartinê ya li bajar bibim dixwazim der barê Erdexanê û hilbijartinên wê de hin agahî parve bikim; Erdexan jî mîna Îdir û Qersê yek ji bajarê Serhedê yê pir netew e. Li bajar gelên mîna kurd, tirkên ahiskayê, terekeme, gurcî, çerkez dijîn. Erdexan bajarê herî biçûk ê bakurê Kurdistanê ye û çemekî mezin ê bi navê Kura di ber re derbas dibe. Li gorî daneyên dawîn 92 hezar û 481 kes li bajar û navçeyên wê dijîn. Li seranserê Erdexanê 69 hezar û 874 hilbijêr hene û wê di 357 sindoqan de dengê xwe bi kar bînin.
Nîqaşa tund a li HDP’ê
Bi navê Zûrzûnan, Dehmal, Golan, Xaçrêk, Posxov 5 navçeyên Erdexanê hene. Navçeyên wê jî mîna Erdexan biçûk in û hejmarên wan negihîjin 10 hezaran. Tenê Golan ji navçeyên din hinek mezintir e. Partiyên li ser xeta HDP’ê her çiqas li bajar dengekî baş bigirin jî heta niha di hilbijartinên giştî de tenê di 7’ê Hezîranê de karibûne parlamenterek derbixin. Di hilbijartinên herêmî de heta niha li Erdexanê şaredarî bi dest nexistine.
Li Erdexanê li ber avahiya şaredariyê pêya dibim û derbasî avahiya HDP’ê ya Bajar dibim. Li avahiyê komeke HDP’î û Partiya Çep (Sol Partî) li ser rêjeya dengên partiyan ên Erdexanê nîqaşan dikin. Ez dibêjim nîqaş lê qirêk û gewrî li hev diqetinînin. Li ser parvekirina dengan li hev nakin. Her kes cuda cuda dengan li partiyan parve dike û ev jî dibe sedema îtîrazê ya kesên din. Hinek ji wan dibêjin wê Partiya Çepên Kesk bibe yekemîn û hinek ji wan jî angaşt dikin wê CHP bibe.
Serokbajar li bajar najî
Yek ji van kesan serokê Partiya Çep ê Erdexanê Ertekîn Yilmaz e. Lê balkêş e Yilmaz tevî serokatiya xwe ya bajar jî ne li bajar ne li Stebolê dijî. Piştî rabûnê HDP’î dibêjin ku Yilmaz ji CHP’ê re dixebite û ji bo ku agahiyên li HDP’ê ji CHP’ê re ragihîne tê avahiya wan. Piştî vê nîqaşa tund a li avahiya HDP’ê dertêm kuçe û kolanên Erdexanê. Li piraniya kuçe û kolanan gel dibêje ku wê dengê xwe bidin Partiya Çepên Kesk û wê bikin partiya yekemîn. Li taxa Hoçvaniyan, tu kê didî xeberdanê dibêje ku ew kurd e û wê dengê xwe bide Partiya Kesk. Gotin di cih de navenda Erdexanê ji niha ve veguheriye rengê kesk.
Hoçvan heremeke girêdayî navenda Erdexanê ye û ji 24 gundan pêk tê. Her wiha li navenda Erdexanê jî li taxekê bi cih bûne. Hem li taxê hem jî li gundên herêma Hoçvanê herkes dengê xwe dide Partiya Çepên Kesk. Ev jî şansê serkeftina Partiya Çepên Kesk a li bajar zêdetir dike. Gelek kes dibêjin ku hewce nake rengê dengê wan bê pirsin û ji vê pirsê aciz dibin. Ciwanên li dikaneke berber ji ber vê pirsê ji min re dibêjin, ‘Bîr kere pirskirina te şaş e. Ma ne diyar e ku em ê dengê xwe bidin kîjan partiyê?’
Li CHP’ê ne lê deng nadinê
Mîna bajarên din li Erdexanê jî berê xwe didim buroyên CHP û AKP’ê. Lewre wê li bajar hilbijartan di navbera Partiya Çepên Kesk, CHP û AKP’ê de derbas bibe. Buroya CHP’ê vala û kes lê tuneye. Tenê çaycî û karkerekî înşaatê lê ne. Balkêş e her du jî dibêjin ku wê dengê xwe bidin Partiya Çepên Kesk. Buroya AKP’ê çend kes lê hene û angaşt dikin wê her du parlamenteran jî ew bigirin. Lê kuçe û kolanên Erdexanê wan derewînin. Gelek esnaf dibêjin ku berê dengê xwe dane AKP’ê lê wê di vê hilbijartinê de ji ber polîtîkayên wê yên aborî û zilmê dengê careke din nedinê. Esnafekî ku nexwest navê xwe bide got ku ew niha jî endamê AKP’ê ye lê wê dengê xwe neda AKP’ê û li şûna wê difikire ku dengê xwe bide Partiya Çepên Kesk.
Piştre derbasî buroyeke hilbijartinê ya Partiya Çepên Kesk bûm. Li buroyê sobaya êzingan hatiye danîn û mirov li xwe berê germ dikin. Li buroyê rojev mitîngên ku wê li bajar bên lidarxistinin. Dibêjin ku AKP hewl dide mitîngên partiyên din asteng bike. Her wiha li buroyê îhtîmala serkeftina Partiya Çepên Kesk dipirsim û hemû kesên li buroyê destnîşan dikin ku li navenda Erdexan û gundên wê partiya yekemînin û ji bo derxistina parlamenterekî balê dikişînin ser girîngiya navçeya Golanê. Dibêjin ku partiya li Golanê dengan bigire wê bibe yekemîn û teqez parlamenterek bişîne meclîsê.
‘Xwezî min bi çavên xwe bidîta’
Li ser vê destnîşankirinê di roja xwe ya duyemîn a li Erdexanê de berê xwe didim Golanê. Namzetê Partiya Çepê Kesk Ozgur Taniş ji Golanê ye û li navçeyê eleqeyeke zêde ji bo wî heye. Destpêkê diçim buroya Partiya Çepên Kesk. Mina kuna kulmoriyan li buroyê liv û tevgereke zêde heye. Piştî buroyê dertêm kolana sereke ya navçeyê û ji welatiyan pirsa rengê dengê wan dikim. Ji niha ve Golaniyan biryara xwe daye û bi yek dengî dibêjin ku wê dengê xwe bidin Partiya Çepên Kesk.
Kesek ji min re dibêje, ‘Ez nexweş im, bûme nîv meriv, îro sibê dimirim. Lê xweziya min 14’ê Gulanê û serkeftina vê partiyê (Partiya Çepên Kesk) bi çavê xwe bidîta, bila wê çaxê mirinê li deriyê min bida. Mirin hezar car mirin, êdî ne xem e’. Her çiqas dixwazim moral bidimê jî dibêje ku ew bi derdê xwe dizane û xwe ji serkeftina Partiya Çepên Kesk û mirinê re amade dike!
Taniş: Em serkeftî ne
Du parlamenterên Erdexanê hene. Herî dawî dixwazim bi her du namzetên Partiya Çepên Kesk re hevdîtin bikim. Ji ber ku derfeta wê çenebû daxwaza min a hevdîtina bi namzeta herî ciwan a Partiya Çepên Kesk Dîcle Akturk re pêk nehat. Lê li navçeya Golanê xwe digihînim Ozgur Taniş û rewşa wan a li bajar û îhtîmala serkeftina wan dipirsim. Bi kurtasî Taniş ev nirxandin kirin:
“Em serkeftî ne. Lê mixabin weke rexnedayînek vê bibêjim, ‘Ev serkeftina me ne ji ber kar û xebatên me ye ji ber bertekên li dijî AKP’ê ye’. AKP li Erdexanê polîtîkayên pişaftinê dimeşîne. Ev jî kurdan û elewiyên li bajar aciz dike. Ji ber van polîtîkayan em berê nikaribûn li vir bixebitin. Lê niha êdî ne wisa ye û ji bo me rewşeke nêzî 7’ê Hezîranê heye. Heke em bi serkevin m ê cemxane û malên şînê bikin malên gel. Em ê girîngiyeke mezin bidin rêveberiyên herêmî li meclîsê ji bo vê bixebitin. Li Erdexanê debar bi sewalkariyê tê kirin lê AKP’ê sewalkariyê jî li bajar nehiştiye. Em ê piştî serkeftina xwe ji bo çareserkirina van pirsgirêkan bixebitin. Wisa diyar e ku namzetekê em ê derbixin û namzetek jî CHP derbixe.”
Li gorî çavdêriyên ku min li bajar kir wê Partiya Çepên Kesk parlamenterek bi hêsanî derbixe û parlamenterê din jî wê rêjeya dengên AKP û CHP’ê diyar bike. Her çiqas CHP’î ji xwe bawer bin jî îhtîmal heye ku AKP parlamenter ji wan bigire.